പുനരുദ്ധാരണ സമർപ്പണം

രാജമുദ്ര പതിഞ്ഞ പുണ്യഭൂമി

ഈ ക്ഷേത്രത്തിന്റെ ചരിത്രം തിരുവിതാംകൂർ രാജവംശവുമായി അഭേദ്യമായി ബന്ധപ്പെട്ടിരിക്കുന്നു. ശത്രുക്കളാൽ ചുറ്റപ്പെട്ട മഹാരാജാവ് മാർത്താണ്ഡവർമ്മ ഒളിവിൽ കഴിഞ്ഞിരുന്ന കാലത്ത്, അദ്ദേഹത്തെ സംരക്ഷിച്ചത് കുറ്റിയാണിക്കാട്ടെ കാരണവരായിരുന്ന അയ്യപ്പൻപിള്ള മാർത്താണ്ഡൻ പിള്ളയും കുടുംബവുമാണ്. അദ്ദേഹത്തിന്റെ വിശ്വസ്തതയ്ക്കും സേവനത്തിനും പ്രത്യുപകാരമായി മഹാരാജാവ് ഏക്കർ കണക്കിന് ഭൂമിയും, അത് സാക്ഷ്യപ്പെടുത്തുന്നതിനായി ശ്രീ പത്മനാഭസ്വാമി ക്ഷേത്രത്തിൽ നിന്നും താമ്രപത്രവും (ചെമ്പ് തകിട്) നൽകി ആദരിക്കുകയുണ്ടായി. കാലാന്തരത്തിൽ ഭൂമിയെല്ലാം അന്യം നിന്നുപോയെങ്കിലും, അവശേഷിക്കുന്ന പത്തു സെന്റ് സ്ഥലത്ത് ഇന്നും ആ പഴയ പ്രതാപത്തിന്റെ ശേഷിപ്പുകളുമായി ഈ ക്ഷേത്രം നിലകൊള്ളുന്നു.